Keppst um fráköstin hjá Snæfelli

Þær eru baráttuglaðar stelpurnar í toppliði Snæfells í Dominos-deild kvenna. Snæfellsliðið hefur unnið 11 af fyrstu 12 deildarleikjum sínum í vetur, þar af þá átta síðustu. Baráttugleði leikmanna liðsins kristallast ekki síst í tölfræðinni yfir sóknarfráköst.

Ekkert lið í deildinni hefur nefnilega tekið fleiri sóknarfráköst (Snæfell er með 23 fleiri en næsta lið) og þótt liðið eigi ekki leikmann á topp þrjú yfir flest sóknarfráköst er það sameiginlegt átak sem er að skila liðinu 22 sóknarfráköstum í leik.

Það eru alls sjö leikmenn Snæfellsliðsins sem taka tvö fráköst eða fleiri að meðaltali. Allar eru þessar sjö á meðal 22 efstu í sóknarfráköstum eftir tólf fyrstu umferðirnar.

Hólmarar eiga meira að segja einn til viðbótar á listanum því Unnur Lára Ásgeirsdóttir, sem er úr Stykkishólmi en spilar með Breiðabliki, er í 10. sæti listans með 2,92 að meðaltali í leik.

Flest sóknarfráköst í leik hjá Snæfelli í vetur:

1. Kristen Denise McCarthy 4,50

2. Hugrún Eva Valdimarsdóttir 3,82

3. Hildur Sigurðardóttir 2,67

4. María Björnsdóttir 2,25

5. Gunnhildur Gunnarsdóttir 2,17

6. Helga Hjördís Björgvinsdóttir 2,09

7. Berglind Gunnarsdóttir 2,08