Stuðmenn frá frumbernsku til efri ára

Saga Stuðmanna, elstu starfandi unglingahljómsveitar landsins, er rakin frá frumbernsku til efri ára í sjónvarpsheimildarmynd, sem handritshöfundarnir Ágúst Guðmundsson leikstjóri og Jón Þór Hannesson framleiðandi hafa undanfarið unnið að.

„Við höfum lagt töluverða vinnu í að grafa upp myndefni allt frá því Stuðmenn stigu fyrst á svið fyrir fjörutíu árum. Frá þeim tíma eru reyndar bara til ljósmyndir, sem við fengum bæði úr ljósmyndasöfnum í einkaeigu og á fjölmiðlum. Eftirleikurinn var auðveldari því hin síðari ár hafa Stuðmenn ekki stigið á svið án þess að vera ljósmyndaðir og filmaðir í bak og fyrir,“ segir Ágúst.

Myndin er í tveimur þáttum, sá fyrri nefnist Fræi sáð í frjóan svörð og sá síðari Snyrtimennskan í fyrirrúmi, hvor um 50 mínútur að lengd. Kynni Ágústs af Stuðmönnum hófust 1982 þegar hann leikstýrði Með allt á hreinu og hefur hann bæði unnið og fylgst með sveitinni allar götur síðan. Við gerð Sögu Stuðmanna segist hann víða hafa leitað fanga, t.d. í smiðju RÚV og Stöðvar 2 þar sem hann fékk gamlar upptökur.

„Sævar Guðmundsson hefur hafist handa við klippivinnuna. Samsetningin er tímafrek, en vonandi tekst okkur að ljúka við myndina í lok ársins,“ segir Ágúst og upplýsir að hún byggist að miklu leyti á viðtölum við liðsmenn sveitarinnar sem og dyggustu aðdáendur hennar.

„Sumt um hljómsveit allra landsmanna hefur kannski ekki verið á allra vitorði,“ bætir hann íbygginn við.