Vopnabúr Denver gegn Sprengjusveit Seattle

Einna athyglisverðast verður að fylgjast með hvernig Peyton Manning, leikstjórnanda Denver, ferst úr hendi að stýra sóknarleik sinna manna gegn gríðarsterkri aftari varnarlínu Seattle-liðsins – svokallaðri sendingavörn. Síðarnefndi hópurinn gengur undir gælunefninu Sprengjusveitin (e. Legion of Boom) og er skipaður hópi háværra, áberandi og að sumu leyti athyglissjúkra ungra manna sem finnst ekkert skemmtilegra en að stíga fram með digurbarkalegar yfirlýsingar sem þeim tekst svo yfirleitt að standa undir.

Hinn 37 ára gamli Manning er hins vegar hógværðin uppmáluð og lætur yfirleitt duga að láta verkin tala. Hann gerir yfirleitt lítið úr eigin framlagi og er duglegur að lofa liðsfélaga sína þegar vel gengur.

Það er sannarlega réttnefni að kalla útherjasveit Mannings vopnabúr en það eru þeir leikmenn sem hafa það hlutverk að grípa sendingar leikstjórnandans. Í fyrsta sinn í sögunni eru nú fimm leikmenn í sama liðinu með minnst tíu snertimörk yfir tímabilið. Þeir eru útherjarnir Demaryius Thomas, Eric Decker og Wes Welker, innherjinn Julius Thomas og hlauparinn Knowshon Moreno.

Sprengjusveitin áðurnefnda hefur það hlutverk að taka vopnin úr greipum Mannings og snúa þeim gegn honum. Seattle-vörnin er nefnilega sú besta í því að komast inn í sendingar andstæðinga og refsa með því að skora mark – ekki ólíkt því sem við þekkjum úr handboltanum. Munurinn er sá að mörkin eru mun „dýrmætari“ í NFL og því geta varnir liðanna hreinlega umturnað heilu leikjunum á svipstundu.

Vörn Seattle fer yfirleitt fremst í sínum flokki og tölfræðin sannar það. Vörnin fékk fæst stig á sig allt tímabilið, fæsta sendingarjarda á sig að meðaltali í leik og átti flesta stolna bolta eða 39 talsins yfir árið. Flest inngrip á hinn málglaði bakvörður, Richard Sherman, eða átta talsins en hann var einn þriggja varnarmanna liðsins sem komust í úrvalslið NFL-deildarinnar í ár. Hinir eru Earl Thomas og Kam Chancellor – allir meðlimir hinnar rómuðu Sprengjusveitar.

Super Bowl verður í beinni útsendingu á Stöð 2 Sport HD í kvöld. Upphitun hefst klukkan 22.00 en leikurinn sjálfur klukkan 23.25. Andri Ólafsson stýrir umræðum á meðan leiknum stendur og áhorfendur eru hvattir til að taka þátt á Twitter með merkinu ‪#‎NFLisland‬.