Syrgir á fremsta bekk á heimaleikjum Lakers

Boxarinn Floyd Mayweather varð vitni að því á mánudag er vinur hans myrti eiginkonu sína og tók í kjölfarið eigin líf.

Þrátt fyrir að hafa orðið vitni að þessum harmleik í gegnum Facetime þá mætti Mayweather næstu tvö kvöld á heimaleiki LA Lakers þar sem hann skemmti sér konunglega.

Hegðun hnefaleikakappans þykir vera með hreinum ólíkindum og enginn virðist skilja hann almennilega.

Rapparinn Earl Hayes, sonur Isaac Hayes, hafði samband við Mayweather á mánudagsmorgninum. Sagðist hafa grunsemdir um að konan hans væri að halda framhjá. Þess vegna ætlaði hann sér að drepa hana.

Mayweather er sagður hafa grátbeðið Hayes um að láta hana í friði en hann náði ekki til félaga síns sem skaut eiginkonuna og sjálfan sig beint í kjölfarið.