Hamilton fljótastur á báðum æfingum

Lewis Hamilton á Mercedes var fljótastur allra á báðum æfingum dagsins í Abú Dabí. Liðsfélagi hans, Nico Rosberg var þó ekki langt á eftir.

Mercedes tvíeykið skiptist á að setja hraðasta hring á meðan á fyrri æfingunni stóð. Hamilton náði þó undirtökum í lok hennar.

Fernando Alonso á Ferrari varð þriðji og Sebastian Vettel á Red Bull fjórði. Williams bílarnir virðast komnir með nóg af 2014, yfirbygging þeirra beggja varð laus og losnaði alveg af hjá Valtteri Bottas. Williams liðið segir að þetta verði ekki vandamál héðan í frá.

Munurinn á milli Hamilton og Rosberg var 0,133 sekúnda á fyrri æfingunni, munurinn var enn minni á seinni æfingunni eða 0,083.

Kevin Magnussen á Mclaren varð þriðji á seinni æfingunni, með þónokkuð af uppfærslum fyrir 2015 á bílnum. Alonso setti ekki tíma á æfingunni vegna vélavandræða.

Romain Grosjean á Lotus verður færður aftur um 20 sæti á ráslínu eftir að hafa þurft að skipta út íhlutum í vél sinni.

Tímatakan verður afar spennandi á morgun, það er erfitt að taka fram úr á Yas Marina brautinni og því mikilvægt að ná góðri stöðu á ráslínu. Sérstaklega fyrir Rosberg og Hamilton sem glíma um heimsmeistaratitil ökumanna.

Bein útsending frá tímatökunni hefst klukkan 12:50 á morgun á Stöð 2 Sport. Bein útsending frá keppninni á sunnudag hefst klukkan 12:30 einnig á Stöð 2 Sport.