Stærsta flutningaskip heims vígt

Stærsta flutningaskip heims var vígt í Suður-Kóreu í síðustu viku. Í frétt IHS Maritime segir að pláss sé fyrir 19 þúsund gáma á skipinu.

Fyrirtækið China Shipping Coinatiled Lines, CSCL, vígði skipið og er áætlaður kostnaður metinn um 17 milljarðar króna. Skipið er 400 metra langt, 58 metra beitt og getur alls flutt farm sem er 183.800 tonn að þyngd.

Skipið, CSCL Globe, er útbúið sérstökum búnaði sem gerir það að verkum að skipið nýtir 20 prósent minna eldsneyti á hvern gám samanborið við helmingi smærri skip.

Skipið mun flytja vörur milli Asíu og Evrópu, en CSCL hyggst vígja fjögur systurskip af sömu gerð fyrir árslok.

Flutningaskipið Mærsk Mc-Kinney Møller var áður stærsta flutningaskip heims, en það getur flutt 18 þúsund gáma í hverri ferð.