Tvö stór mót á dagskrá um helgina

Það verður mikið um að vera í golfheiminum um helgina en tvö stór mót verða á dagskrá. PGA-mótaröðin stoppar við í Mexíkó á El Camaleon vellinum sem hannaður af Greg Normal en þar á Bandaríkjamaðurinn Harris English titil að verja.

Það er líka mikið um dýrðir á Evrópumótaröðinni en Turkish Airlines Open fer fram um helgina. Mótið er það næst síðasta á mótaröðinni í ár og því eru vegleg verðlaun í boði.

Meðal þeirra sem skráðir eru til leiks á hinum glæsilega Montgomerie Maxx Royal velli í Tyrklandi eru nokkrir af bestu kylfingum heims, meðal annars Sergio Garcia, Henrik Stenson, Martin Kaymer, Luke Donald, Lee Westwood og Ian Poulter.

Einn mest spennandi kylfingur heims um þessar mundir, Victor Dubuisson, skaust upp á stjörnuhimininn með sigri á mótinu í fyrra en búast má við því að hann verji titil sinn af krafti.

Bæði mótin verða sýnd á Golfstöðinni í beinni útsendingu alla helgina en útsendingartímana má nálgast hér.