Jungle hættir við tónleika á Airwaves

Breska sveitin Jungle hefur aflýst tónleikum sínum á tónlistarhátíðinni Iceland Airwaves sem hefst á morgun. Tónleikar sveitarinnar áttu að fara fram í Gamla bíói á laugardagskvöldið.

Í stað Jungle treður íslenska sveitin Retro Stefson upp á þeim tíma sem Jungle átti að fara á svið samkvæmt frétt á heimasíðu tónlistarhátíðarinnar.

Jungle var stofnuð af Josh Lloyd-Watson og Tom McFarland árið 2013 en þeir eru æskuvinir. Sveitin gaf út smáskífuna The Heat í október í fyrra og í desember var hljómsveitin tilnefnd til Sound of 2014-verðlaunanna hjá BBC. 

Fyrsta plata sveitarinnar, Jungle, kom út í júlí á þessu ári og keppti um Mercury-verðlaunin í september.

Samkvæmt frétt á heimasíðu Iceland Airwaves gat hljómsveitin ekki troðið upp á hátíðinni vegna sjónvarpsviðburðar sem sveitin þurfti að sækja.