Knox og Putnam leiða eftir tvo hringi í Las Vegas

Skotinn Russell Knox og Badaríkjamaðurinn Andrew Putnam leiða á Shriners mótinu sem fram fer á TPC Summerlin vellinum í Las Vegas en eftir tvo hringi eru þeir báðir á tíu höggum undir pari.

Andrew Putnam er nýliði á PGA-mótaröðinni en eldri bróðir hans, Michael Putnam, hefur leikið á henni í tvö ár. Annar nýliði sem er að gera gott mót í Las Vegas er Tony Finau en hann deilir þriðja sætinu með Andrew Svoboda á níu höggum undir pari.

Sigurvegari síðasta árs, Webb Simpson, er einnig í góðum málum en hann er ásamt mörgum öðrum kylfingum jafn í fimmta sæti á átta höggum undir pari.

Tilþrif dagsins í gær átti samt sem áður Justin Thomas sem yfirsló 15. flötina í tveimur höggum, alla leið inn á pall sem ætlaður var áhorfendum. Þar var boltinn sláanlegur en Thomas gerði sér lítið fyrir og vippaði inn á flöt af pallinum og endaði á því að fá fugl á þessari par 5 holu við mikinn fögnuð viðstaddra.

Þriðji hringur frá Las Vegas verður í beinni útsendingu á Golfstöðinni og hefst útsending klukkan 21:00 í kvöld.