Hafnarfjarðarliðin unnu bæði

Fjórir leikir fóru fram í Olís-deild karla í handbolta í kvöld. Afturelding er áfram með fullt hús stiga eftir sigur á ÍR í Austurberginu og Eyjamenn höfðu betur gegn Stjörnunni í Eyjum.

Í Schenker-höllinni áttust Haukar og Valur við í miklum spennuleik. Leikurinn var jafn framan af, en í stöðunni 8-8 skoruðu Valsmenn þrjú mörk í röð. Gestunum mistókst hins vegar að fylgja þessum góða kafla eftir og Haukarnir enduðu fyrri hálfleikinn á 6-3 kafla.

Leikurinn var áfram í járnum í upphafi síðari hálfleiks, þótt Valsarar væru jafnan á undan að skora.

Janus Daði Smárason kom Haukum yfir, 24-23, þegar fjórar mínútur voru eftir, en Finnur Ingi Stefánsson jafnaði metin með sínu áttunda marki. Það var síðan Árni Steinn Steinþórsson sem tryggði Haukum sigurinn með marki nokkrum sekúndum fyrir leikslok. Lokatölur 25-24, Haukum í vil.

Markaskorarar Hauka:

Janus Daði Smárason 6, Adam Haukur Baumruk 4, Árni Steinn Steinþórsson 4, Þröstur Þráinsson 3, Einar Pétur Pétursson 3, Jón Þorbjörn Jóhannsson 2, Heimir Óli Heimisson 1, Þórarinn Leví Traustason 1, Arnar Ingi Guðmundsson 1.

Markaskorarar Vals:

Finnur Ingi Stefánsson 8, Guðmundur Hólmar Helgason 4, Ómar Ingi Magnússon 3, Geir Guðmundsson 2, Kári Kristján Kristjánsson 2, Vignir Stefánsson 2, Bjartur Guðmundsson 1, Alexander Örn Júlíusson 1, Elvar Friðriksson 1.

HK-ingar unnu sinn fyrsta sigur á tímabilinu gegn Fram í síðustu umferð og þeir mættu grimmir til leiks. Eftir fimm mínútna leik var staðan 1-3, HK í vil, en þá tóku Hafnfirðingar heldur betur við sér, skoruðu níu mörk í röð og breyttu stöðunni í 10-3.

HK-ingar náðu aðeins að laga stöðuna og minnkuðu muninn í 14-9, en þá tóku FH-ingar aftur við sér, skoruðu fjögur mörk gegn tveimur og leiddu í leikhléi, 18-11.

Heimamenn gengu svo endanlega frá leiknum í byrjun seinni hálfleiks. Eftir 40 mínútna leik var staðan 26-15 og eftir það var aðeins spurning hversu stór sigurinn yrði.

Svo fór að FH vann með átta mörkum, 36-28, en Hafnfirðingar eru með sjö stig í 3. sæti deildarinnar.

Markaskorarar FH:

Ragnar Jóhannsson 9, Halldór Ingi Jónasson 6, Magnús Óli Magnússon 5, Benedikt Reynir Kristinsson 4, Ásbjörn Friðriksson 3, Ísak Rafnsson 3, Henrik Bjarnason 3, Hlynur Bjarnason 1, Andri Berg Haraldsson 1, Daníel Matthíasson 1.

Markaskorarar HK:

Leó Snær Pétursson 7, Andri Þór Helgason 5, Þorgrímur Smári Ólafsson 4, Garðar Svansson 3, Tryggvi Þór Tryggvason 3, Óðinn Þór Ríkharðsson 2, Guðni Már Kristinsson 2, Björn Þórsson Björnsson 1, Aron Gauti Óskarsson 1.