113 fiskar gengu upp í Gljúfurá í vikunni

Veiðin í Gljúfurá í Borgarfirði hefur oft verið góð síðustu dagana á veiðitímabilinu og miðað við þær upplýsingar sem koma úr laxateljaranum ættu lokadagarnir núna að vera mjög góðir.

Heildargangan í ánna er 556 fiskar, mest lax en eitthvað af sjóbirting, en það sem vekur sérstaka athygi er að síðustu 7 daga hafa 113 fiskar gengið upp í ánna og þar inná milli eru laxar allt 90 cm langir.  Það er ótrúlegt að sjá að um 20% göngunnar í ánna í sumar komi svona seint og styðja þessi gögn þá kenningu sem margir veiðimenn sem þekkja vel til Gljúfurár hafa haldið fram, að í henni sé nokkuð sterkur stofn sem gangi í hana frá miðjum september og jafnvel síðar.  Alls höfðu veiðst 177 laxar í ánni í síðustu viku þannig að hún á ennþá ca 350 óveidda fiska í hyljum sínum sem getur ekki þýtt annað en að nóg verði af hrygningarfisk í henni að tímabili loknu.  Þó svo að einhverjir lausir dagar séu í ánni verður nóg eftir af laxi í henni eftir tímabilið svo það er ekki annað að sjá en að áin sé í góðum málum.