Argentínumenn þurfa að halda áfram að semja

Dómstóll Vestanhafs hefur úrskurðað að viðræður argentínska ríkisins við kröfuhafa sína verði að halda áfram þrátt fyrir að Argentína hafi lýst yfir greiðslufalli. Vogunarsjóðir sem keypt hafa kröfur á argentínska ríkið eru í sumum tilvikum þeir sömu og keypt hafa skuldabréf föllnu bankanna hér á landi. 

Þegar Argentína lýsti síðast yfir greiðslufalli (e. default) árið 2001 samdi argentínska ríkið við 92% kröfuhafa sinna en hluti þeirra, bandarískir vogunarsjóðir, sættu sig ekki við þá samninga og kröfðust fullrar greiðslu fyrir sín ríkissuldabréf sem verðlögð eru á jafnvirði 170 milljarða króna.

Kröfur þessara vogunarsjóða eru í raun ástæðan fyrir vanda landsins núna. Bandarískur dómstóll dæmdi vogunarsjóðunum í vil í síðasta mánuði og frestur stjórnvalda í Argentínu til að semja við þá rann út aðfaranótt fimmtudags. Þegar samningar tókust ekki ákvað ríkisstjórn Argentínu að lýsa yfir greiðslufalli í annað sinn á 13 árum. Jorge Capitanich, talsmaður argentínsku ríkisstjórnarinnar, kenndi bandarískum dómstólum um hvernig fór í viðtali við þarlenda fjölmiðla.  

Nafntogaðir pistlahöfundar um efnahagsmál hafa tekið málstað Argentínu. Til dæmis ritaði Martin Wolf einn af efnahagsritstjórum Financial Times þessa grein fyrr í sumar undir fyrirsögninni: Verjum Argentínu fyrir hrægömmunum.

Í greininni segir Wolf að krafa um að Argentínumenn greiði skuldabréf sín að fullu sé „fjárkúgun með stuðningi bandarískra dómstóla.“

Gjaldfella önnur bréf

Yfirlýsing um greiðslufall þýðir að eigendur annarra skuldabréf geta gjaldfellt bréfin því gjaldfellingarákvæði í þessum bréfum verða virk. Það sama gera fyrirtæki sem hafa tryggt skuldir argentínska ríkisins með sérstökum skuldatryggingum. 

Í gær kvað dómstóll í New York síðan upp úrskurð þess efnis að argentínska ríkið verði að halda áfram viðræðum við kröfuhafa sína þrátt fyrir yfirlýsingu um greiðslufall.

Fjárfesta í ríkjum þar sem neyð ríkir

Hrægammasjóðirnir sem eiga kröfu á argentínska ríkið eru í mörgum tilvikum þeir sömu og hafa keypt skuldabréf föllnu bankanna hér á Íslandi á hrakvirði.Þar má nefna sjóðinn Elliott Management sem sérhæfir sig í að fjárfesta í ríkjum sem glíma við neyð eða standa frammi fyrir greiðsluþroti.

Hrægammasjóðir af þessu tagi hafa komið sér þægilega fyrir á Íslandi en það er samt grundvallarmunur á stöðu Íslands og Argentínu því í tilfelli Argentínu eiga vogunarsjóðirnir kröfur á argentínska ríkið en hér á landi eiga þeir aðallega kröfur á fjármálafyrirtæki í slitum. Þeir eru því ekki að fara að banka upp á í fjármálaráðuneytinu við Arnarhvol í fyrirsjáanlegri framtíð.