Garcia saxar á forskot McIlroy

Sergio Garcia hefur leikið manna best á lokahring Opna breska Meistaramótsins sem er í gangi þessa stundina.

Rory McIlroy var með nokkuð örugga sex högga forystu fyrir daginn í dag á Rickie Fowler og sjö högga forskot á Sergio Garcia. Hann fékk sannkallaða draumabyrjun þegar hann fékk fugl á fyrstu holu en tveir skollar í röð hleyptu Sergio Garcia inn í mótið á ný.

Garcia fékk þrjá fugla á fyrstu fimm holunum en stimplaði sig af alvöru inn í toppbaráttuna með erni á tíundu holu og var munurinn skyndilega kominn niður í tvö högg.

Rory nældi hinsvegar í fugl á tíundu holu og er munurinn aftur kominn upp í þrjú högg þegar átta holur eru eftir.