Tarantino tók maríulaxinn í Hítará

Hollywood-leikstjórinn Quentin Tarantino var að ljúka veiðum í Hítará þar sem hann dvaldi með góðum hóp vina sinna. Landaði hann fyrsta laxinum sínum í túrnum.

Leiðsögumenn og staðarhaldarar sögðu leikstjórann hafa verið einstaklega mikið ljúfmenni og áhugasamur við veiðarnar. Gleðin var því mikil þegar hann náði fyrsta laxinum sínum neðan við veiðihúsið með góðri aðstoð leiðsögumanns og háfara.

Hvort Quentin Tarantino verði hér eftir reglulegur gestur í laxveiðiánum eins og Eric Clapton og önnur fyrirmenni er ekki vitað. Eitt er þó víst, hann er kominn í hóp þeirra sem veiðibakterían bítur í á hverju sumri.  Þess má geta að Hítará er komin í 150 laxa og ágætar göngur hafa verið í ánna síðustu daga.