Sjáðu öll bestu tilþrif dagsins á Opna breska

Rory McIlroy er með eins höggs forystu eftir fyrsta keppnisdag á Opna breska meistaramótinu sem hófst í dag á Royal Liverpool í Englandi. Opna breska er að margra mati hátindur ársins í atvinnugolfinu og eru allir bestu kylfingar heims með í þessu sögufræga móti sem fram fer í 143. sinn í ár.

Norður-Írinn Rory McIlroy lék á 66 höggum eða sex höggum undir pari í dag. Hinn 24 ára gamli McIlroy er höggi betri en Ítalinn Matteo Manassero sem byrjar vel. Þrír Ítalar eru meðal efstu kylfinga því Francesco og Eduardo Molinari-bræður koma jafnir á 68 höggum.

Mörg þekkt nöfn byrja vel meðal annars Tiger Woods sem lék á 69 höggum í dag eða þremur höggum undir pari. Sú byrjun þykir lofa góðu en hann er að snúa aftur eftir meiðsli í baki. Adam Scott og Sergio Garcia byrja einnig vel og léku á 68 höggum.

Hér að ofan má sjá veglega samantekt frá fyrsta hring á Opna breska. Mótið er í beinni útsendingu á Golfstöðinni og hefst útsending frá öðrum keppnisdegi kl. 08:00 í fyrramálið og stendur fram á kvöld.