Þraukar Malaysia Airlines?

Eftir að flugvél Malaysia Airlines, MH17, var skotin niður yfir Úkraínu í gær þar sem 298 manns létu lífið, hafa margir velt fyrir sér framtíð flugfélagsins sem hefur verið nátengt tveimur harmleikum á mjög skömmum tíma.

Fyrirtækið hefur þegar átt erfitt ár í kjölfar brotthvarfs farþegaflugvélarinnar MH370 í mars síðastliðnum. Þá stóð leit að vélinni týndu vikum saman en án nokkurs árangurs. Vélin hefur ekki enn verið fundin. Flugfélagið ásamt malasísku ríkisstjórninni var gagnrýnt harðlega fyrir aðkomu sína að málinu.

Strax eftir að MH17 var skotin niður féll hlutabréfavirði Malaysian Airlines um heil 11 prósent. Þegar á árinu 2014 hefur heildarvirði hlutabréfa flugfélagsins fallið um 35 prósent. Ljóst er að flugfélagið stendur frammi fyrir heljarmiklu tapi af þessum endurteknu óförum flugvéla sinna.

Í grein Guardian um málið segir rekstrargreinandinn Mohsin Aziz, sem sérhæfir sig í flugfélögum, að jafnvel fyrir seinni hörmungarnar hafi honum fundist ólíklegt að félagið yrði enn starfandi seinni hluta ársins 2015.

„Viðskiptavininn langar bara einfaldlega ekki að fljúga með Malaysian Airlines lengur. Það er næstum ómögulegt fyrir flugfélagið að kljást við slíkt gífurlegt ímyndarvandamál," segir Aziz.