Virtir frumkvöðlar á sviði HIV-rannsókna voru um borð

Á meðal þeirra sem létust eftir að MH17 var skotin niður var hópur vísindamanna á leið á alþjóðlega alnæmisráðstefnu. 

Áströlsk dagblöð greindu frá því að allt að 108 þátttakendur á alþjóðlegu alnæmisráðstefnunni sem verður í Melbourne í næstu viku hafi verið um borð í MH17.

Á meðal þeirra sem hefur verið staðfest að var um borð er Joep Lange sem var mjög framarlega í rannsóknum á HIV veirunni var forseti International AIDS Society, að því er fram kemur á Vox. 

Lange sem var prófessor í læknisfræði og yfirmaður alþjóðlegrar lýðheilsu hjá Háskólanum í Amsterdam hafði starfað við meðhöndlun á HIV og rannsóknum á sjúkdómnum frá 1983 um það leyti sem sjúkdómurinn og lokastig hans, alnæmi, var fyrst að koma fram. Lange var framarlega í því að finna lausnir til að tryggja meðhöndlun við sjúkdómnum í þriðja heiminum.

Dr. Martin S. Hirsch, prófessor við Harvard Medical School, segir að Lange hafi nálgast vandamál tengd meðhöndlun á HIV á rökréttan hátt og gert eitthvað í málunum. Fundið lausnirnar. Haraldur Briem sóttvarnarlæknir hjá Embætti landlæknis segir að Lange hafi verið framarlega og ákveðinn frumkvöðull á sviði rannsókna á HIV. Hins vegar sé gríðarlegur fjöldi vísindamanna mjög framarlega í rannsóknum á þessu sviði.

Bretinn Glenn Thomas er annar sem er hefur verið staðfestur. Thomas starfaði fyrir Alþjóðaheilbrigðismálastofnunina. Hollensku aðgerðasinnarnir Pim de Kuijer og Martine de Schutter voru líka um borð en þau voru leiðandi í baráttunni gegn HIV og alnæmi á heimsvísu.

Bryndís Sigurðardóttir er smitsjúkdómalæknir á Landspítalanum. Bryndís sagði í hádegisfréttum Bylgjunnar að í stóra samhengi hlutanna hefði fráfall þeirra sem voru um borð ekki teljandi áhrif á stöðu rannsókna á HIV-veirunni þar sem þúsundir vísindamanna í fremstu röð sinntu rannsóknum á þessu sviði. Fyrst og fremst væri þetta mannlegur harmleikur fyrir þá sem létust þegar MH17 var skotin niður og aðstandendur þeirra.