Heimsmet á Hellu

Heldur betur hefur ræst úr veðri á Gaddstaðaflötum á Hellu og sólin farin að skína á gesti Landsmóts hestamanna. Áætlað er að nú séu um fimm þúsund manns á svæðinu. Er það mál manna að hestakosturinn sé sérlega sterkur á Landsmótinu að þessu sinni, ekki síst i A-flokki.

Nokkur met voru slegin í blíðunni í dag. Metdómur var gefinn í flokki fjögurra vetra stóðhesta, en það var knapinn Agnar Þór Magnússon sem reið Konserti frá Hofi í 8,60 fyrir hæfileika, þar af var kveðin upp fágæt einkunn, 10 fyrir tölt. Konsert frá Hofi er sonur Óms frá Kvistum landsmótssigurvegara í A-flokki 2011.

Þá sló Bjarni Bjarnason bæði Íslandsmet og heimsmet í 250 skeiði á hraðskreiðu hryssunni Heru frá Þóroddsstöðum. Fóru þau 250 metrana á 21,76 sekúndum. Að auki setti Teitur Árnason Íslandsmet í 150 metra skeiði á Tuma frá Borgarhóli, fóru þeir brautina á 13,77 sekúndum.