Renault mun ekki ná framförum fyrr en 2015

Franski vélaframleiðandinn Renault gerir ekki ráð fyrir miklum bætingum á vél sinni í ár vegna takmarkana á þróun.

Christian Horner liðsstjóri Red Bull, sem er mikilvægasti viðskiptavinur Renault kallaði 2014 vélina „óásættanlega,“ eftir keppnina í Austurríki.

Red Bull hefur ítrekað heimtað úrbætur á tímabilinu. Sebastian Vettel hætti keppni í þriðja sinn á tímabilinu í síðustu keppni vegna vélavandræða. Slíkt þekktist varla hjá Red Bull eða Renault fyrir reglubreytinguna sem tók gildi fyrir yfirstandandi tímabil.

Reglurnar segja að setja skuli þróun vélanna á frost á meðan á keppnistímabilinu stendur. Vissar undanþágur fengust í ár vegna þess hve miklar breytingar voru geðrar. Nú hins vegar hefur vélafrostið tekið gildi.

„Við getum þróað olíu og eldsneyti og við getum uppfært það út tímabilið, og hugbúnaðinn. Það má með sanni segja að staðan sé sú núna að við verðum að reyna að ná sem mestu út úr því sem við höfum. Við munum ekki auka aflið um 10% fyrir næstu keppni með því að breyta hugbúnaðinum - það er ekki hægt,“ segir Remi Taffin yfirmaður kappakstursmála hjá Renault.

Renault lítur á næsta ár sem nýtt upphaf.

„Þróunin (í ár) er eitt en við höfum hafið að þróa vél fyrir næsta ár nú þegar. Það er ekki vegna þess að við erum að einbeita okkur meira að 2015 en 2014 heldur bara vegna þess að fyrir 2015 vélina höfum við frelsi til að þróa vélina okkar, koma með nýja hluti, í raun næstum algjört (frelsi),“ sagði Taffin að lokum.