Kaymer og Spieth jafnir fyrir lokahringinn á Players

Jordan Spieth hefur enn ekki fengið skolla á Players meistaramótinu þegar að þrír hringir eru búnir en hann leiðir mótið ásamt hinum þýska Martin Kaymer. Báðir kylfingar eru á 12 höggum undir pari en Spánverjinn Sergio Garcia og Ástralinn John Senden eru jafnir í þriðja sæti á níu undir pari og gætu blandað sér í baráttuna um sigurinn með góðum hring í dag.

Með sigri gæti Spieth orðið yngsti sigurvegari Players frá upphafi en mótið er oftar en ekki kallað fimmta risamótið enda leika allir bestu kylfingar heims í því og verðlaunaféð er með því hæsta sem gerist.

Bein útsending frá lokahringnum á TPC Sawgrass hefst á Golfstöðinni klukkan 16:30 í dag.