Daníel Freyr til SönderjyskE

Daníel Freyr Andrésson, markvörður FH, er á förum frá félaginu en hann hefur fengið drög af samningi við danska félagið SönderjyskE. Þetta kemur fram í Morgunblaðinu í morgun.

„Ég er búinn að fá drög að samningnum og ég reikna með að fá formlegt samningstilboð frá félaginu í þessari viku," sagði Daníel Freyr Andrésson í samtali við Guðmund Hilmarsson á Morgunblaðinu.

Daníel Freyr var frá keppni í tæpa fimm mánuði á þessu tímabili eftir að hafa handarbrotnað en náði að spila með FH-liðinu í úrslitakeppninni þar sem liðið tapaði í oddaleik í undanúrslitaeinvíginu á móti Haukum.

„Maður hefur stefnt að því síðustu árin að komast út í atvinnumennsku og nú er það vonandi að rætast," sagði Daníel Freyr í fyrrnefndu viðtali.