Hardy bað um að vera áfram hjá Haukum

Lele Hardy, besti erlendi leikmaður Domino's-deildar kvenna síðastliðinn vetur, verður áfram í herbúðum Hauka næstu tvö árin.

Þetta var staðfest á heimasíðu Hauka í dag en Hardy hefur verið kjörin besti erlendi leikmaður deildarinnar undanfarin þrjú ár. Hún hefur farið á kostum hér á landi og var bæði stiga- og frákastahæsti leikmaður deildarinnar í vetur.

Fram kemur á heimasíðu Hauka að þó nokkur lið hafi reynt að semja við Hardy en hún fór sjálf fram á að samningur hennar yrði framlengdur um tvö ár.

Haukar urðu bikarmeistarar í vetur en töpuðu fyrir Snæfelli í lokaúrslitum úrslitakeppninnar.