Tveggja kirkjuturna tal Högna er opnunarverk Listahátíðar

Opnunarverk Listahátíðar í Reykjavík er nýtt fimmtán mínútna verk Högna Egilssonar, Turiya, sem hann flytur með Bjöllukór Tónstofu Valgerðar Jónsdóttur og klukkum Hallgrímskirkju og Landakotskirkju.

Verkið verður flutt við Tjörnina í Reykjavík og streymt á siminn.is. Flutningurinn fer fram næsta fimmtudag, 22. maí, og hefst kl. 17.30.

„Ég vil snerta við fólki, miðla hugmyndum sem mér finnast mikilvægar um samúð, ást, ótta, gleði, fegurð og sorgina sem er svo lífseig. Í austrænni heimspeki stendur Turiya fyrir fjórða og æðsta tilverustigið sem liggur handan vöku og drauma og draumlauss svefns. Í verkinu byrjum við við Tjörnina — við djúpið þar sem við sláum grunntóninn. Söngurinn rís úr vatninu meðan tröllin tvö á Skólavörðuholti og Landakoti kallast á. Söngurinn ómar yfir borgina, inn í Esjuna og ofan í Eilífsdal sem liggur að baki henni. Verkið endurspeglar lífsreisu mannverunnar, þar sem Turiya er kjarninn,” segir Högni um verk sitt.

Tjörnin og Reykjavíkurhöfn verða þungamiðjan í dagskrá hátíðarinnar í borginni en hún stendur í tvær vikur, til fimmtudagsins 5. júní.

Síminn og Listahátíð í Reykjavík hafa samstarf í annað sinn um streymi á opnunarverki hátíðarinnar. Í fréttatilkynningu frá Listahátíð segir Pétur Þ. Óskarsson, yfirmaður samskipta Símans, Símann stoltan af samstarfinu við Listahátíð annað árið í röð:

„Listahátíð í Reykjavík er einn af hápunktum í íslensku menningarlífi ár hvert og það er okkur hjá Símanum mikil ánægja og heiður að fá að koma að hátíðinni. Með því að nýta fjarskiptin gerum við öllum landsmönnum kleift að njóta opnunaratriðis hátíðarinnar, hvar sem þeir eru staddir. Við hlökkum til að vinna að því með forsvarsfólki hátíðarinnar að finna nýjar leiðir til að miðla viðburðum  í framtíðinni.“

Hanna Styrmisdóttir, listrænn stjórnandi Listahátíðar, tekur undir þau orð og segir: „Samstarf við Símann gerir Listahátíð kleift að þróa miðlunarleiðir sem við munum tileinka okkur í auknum mæli á næstu árum. Það er mikið tilhlökkunarefni að þróa þær leiðir í samstarfi við leiðandi fyrirtæki á borð við Símann."

Hanna segir ennfremur eitt af markmiðum hátíðarinnar vera að auðvelda aðgengi að viðburðum og að ár hvert séu margir þeirra utan miðasölu. Opnunarverk hátíðarinnar sé jafnan nýtt staðbundið verk sem gert sé sérstaklega fyrir tilefnið. „Verk Högna er þess eðlis að það hefur gríðarlega breiða skírskotun og það er opnunarverk 28. Listahátíðar í Reykjavík. Eðli málsins vegna á það að ná til sem flestra. Samstarfið við Símann er grundvallarþáttur í því í að miðla því til landsmanna allra, sem og alþjóðlega.”

Listahátíð í Reykjavík er nú haldin í 28. skipti og er hátíðin í ár undir titlinum Ekki lokið. Nánar má lesa um dagskrá á vefnum listahatid.is.