Mikið af vænum fiski veiðist í Elliðavatni

Það er alltaf nokkur straumur af veiðimönnum við Elliðavatn og veiðin frá því að vatnið opnaði hefur verið nokkuð góð.

Það sem vekur aftur á móti sérstaka eftirtekt er að fiskurinn, jafnt urriðinn sem bleikjan, er sérstaklega vænn og vel haldinn.  Í fyrra veiddist mun meira af urriða og svo virðist einnig vera í ár en þær bleikjur sem hafa veiðst hingað til eru allar í vænni kantinum, í það minnsta þær sem við höfum fregnir af.  Veiðimaður sem var við vatnið fyrir fáum dögum náði sex urriðum á land úr Helluvatni og voru þeir frá þremur upp í fimm pund sem þykir flott meðalþyngd úr vatninu.  Allir tóku þeir litla svarta streamera sem voru dregnir inn á sökkenda.  Benedikt Þorgeirsson hefur einnig gert það gott í vatninu en hann var þar í gærkvöldi ásamst Gunnari Arnari Gunnarssyni og tóku þeir sitt hvorn fiskinn, báða mjög væna eins og sést á myndinni.  Menn virðast setja í fisk víða í vatninu og það virðist engin staður heitari en annar ennþá en það breytist þegar vatnið hlýnar og fiskurinn leitar í kaldara vatn þá fer hann gjarnan Heiðmerkurmeginn við vatnið þar sem uppsprettur og ár renna í vatnið.