Lotus trúir að bíllinn henti í Mónakó

Lotus liðið stefnir á enn eitt framfarastökkið í viðbót í Mónakó um helgina. Eftir að Romain Grosjean náði í fyrstu stig liðsins á tímabilinu í Barcelona. Liðið er bjartsýnt á enn betri árangur í Mónakó.

Grosjean endaði í áttunda sæti í Barcelona en hefði getað endað ofar. Skynjari á Renault vél hans bilaði og það hægði talsvert á Frakkanum.

Þrátt fyrir að skynjarinn hafi bilað gat Grosjean keppt við Ferrari, Force India og McLaren bílana. Nick Chester, tæknistjóri Lotus, trúir því að fleiri stig muni skila sér í hús í Mónakó.

„Já það held ég,“ sagði Chester þegar hann var spurður hvort bíllinn henti þröngum götum Mónakó.

„Mónakó er frekar einkennilegur staður - einstakur - þannig að það er alltaf hættulegt að gera ráð fyrir að bíllinn þinn sé góður þar. En ég held að hún (Mónakó brautin) muni henta E22 og okkur ætti að vegna þokkalega vel,“ sagði Chester að lokum.

Keppnin i Mónakó fer fram um næstu helgi. Henni fylgir jafnan mikill glamúr og gleði. Keppnin er ein sú elsta sem enn er á keppnisdagatalinu og brautin í miklu uppáhaldi hjá mörgum ökumönnum.