Icebody olli usla í atriði Frikka Dórs

„Fólk virðist vera á báðum áttum með þetta uppátæki okkar, sumir fá illt í sálina og öðrum finnst þetta vera fyndið,“ segir söngvarinn Friðrik Dór Jónsson.

Hlustendaverðlaunin fóru fram í Háskólabíó síðastliðið föstudagskvöld við hátíðlega athöfn. Athygli vakti þegar þeir Friðrik Dór, Steindi Jr. og Bent tóku lagið Alveg sama (Til í allt 2) og fyrir aftan þá félaga voru þær Guðrún Esther Árnadóttir og María Guðmundsdóttir klæddar búrkum og Hulda Icebody fyrir miðju, léttklædd í bikiní.

Þær Guðrún og María hafa oft á tíðum farið með hlutverk í þáttunum Steindinn okkar á Stöð 2.

„Textinn í þessu lagi fjallar í raun um lauflétta firringu og því var þetta hugsað til að vera í stíl við lagið. Það eru vissulega tvær áttræðar konur þarna upp á sviði klæddar búrkum og önnur yngri í bikiní en fyrir verðlaunin hugsuðum við bara út í það hvað væri það fáránlegasta sem við gætum gert.“

Friðrik segir að það hafi ekki sérstaklega verið rætt að sjokkera fólk með þessu atriði.

„Það kann að vera að einhver móðgist við þetta atriði og finnist þetta vera of langt gengið og ég ætla alls ekkert að fara furða mig eitthvað sérstaklega á því. Maður vissi svo sem alveg að einhverjir myndu taka illa í þetta.“

Söngvarinn vill samt sem áður meina að það hafi aldrei verið ætlunin að móðga neinn.

„Ég hef alltaf haft þá stefnu í lífinu að ef ég móðga einhvern þá bið ég þann aðila afsökunar og því geri ég það hér með og bið alla þá afsökunar sem sárnaði á sálinni við það að sjá þetta.“

Friðrik segir að lagið fjalli í raun um það að vera létt firrtur og til í hvað sem er.

„Við leyfðum okkur að fara á þennan stað í textanum og því augljóslega leyfðum við okkur einnig að fara þangað í atriðinu. Kannski var það of langt gengið og ætla ég ekki að mótmæla neinum sem telur svo vera.“

Hér að neðan má sjá atriðið. Fleiri tónlistaratriði má sjá á sjónvarpsvef Vísis.