Afhverju kaupir Facebook önnur fyrirtæki á yfirverði?

Hin "deyjandi" Facebookkaupir farsímaforritið WhatsApp á næstum 2000 milljarða íslenskra króna og maður hlýtur að spyrja sig. Er Mark Zuckerberg á eiturlyfjum?

Kaup á farsímaforriti fyrir þessa upphæð á tímum þar sem einhver 14 ára tölvunjörður getur hvenær sem er ákveðið að búa til sitt eigið forrit sem gerir það sama og betur, teljast varla góð fjárfesting. En afhverju er Facebook stöðugt að kaupa og yfirtaka önnur fyrirtæki á markaðnum og afhverju eru upphæðirnar svona háar?

Hér er listi yfir yfirtökur Facebook síðan 2005 og þó WhatsApp hafi verið dýrt þá var Instagram ekkert ókeypis heldur.

Svo virðist sem að um leið og einhverjum öðrum gengur vel þá er Zuckerberg mættur með veskið á lofti eins og útgerðarmaður þegar Morgunblaðið á í fjárhagskröggum. Og alveg eins og með Morgunblaðið þá finnst manni að verið sé að henda peningum.

Matthew Yglesias, viðskipta og hagfræðigreinir Slate.com, kemur með áhugaveða útskýringu á því afhverju Facebook kaupir að því virðist stjórnlaust en hún er einfaldlega sú að það er hagkvæmara fyrir Zuckerberg, sem á ekki meirihluta lengur í Facebook en hefur meirihluta atkvæða á stjórnarfundum, að kaupa fyrirtæki í staðinn fyrir t.d. að greiða út arð eða verðlauna hlutafjáreigendur.

Ef Facebook notar peningana í að greiða hluthöfum þá fær Zuckerberg bara brot af þeirri upphæð, sennilega í kringum 28% upphæðarinnar en ef peningarnir eru notaðir til að kaupa fyrirtæki þá stjórnar Zuckerberg því vegna þess að hann er Facebook. Facebook er byggt þannig að fyrirtækið fjárfestir mikið, eignast mikið og hlutafjáreigendur eru ekki í fyrsta sæti.

Mark Zuckerberg er að kaupa fyrirtæki fyrir annarra manna fé en eignast þau sjálfur með starfsfólki, hugmyndum og öllu sem því fylgir. Á meðan hlær hann að fjárfestum.