Morrissey vill að prinsarnir Vilhjálmur og Harry skjóti sig

Breski tónlistarmaðurinn Morrissey hefur aldrei verið mikill aðdáandi konungsfjölskyldunnar í Bretlandi og hefur nú skrifað harðort bréf þar sem hann sakar meðlimi hennar um hræsni.

Bréfið sem birtist á aðdáendasíðu Morrissey sakar prinsanna Vilhjálm og Harry um hræsni eftir að þeir fóru í veiðiferð til Spánar aðeins degi eftir að hafa hrundið af stað herferð til að koma í veg fyrir ólöglegar veiðar.

Í bréfi Morrissey segir: „Einum degi eftir að hafa upplýst almenning um dýravernd má finna Vilhjálm á Spáni (ásamt Harry) skjótandi og drepandi eins marga villigelti og dádýr og þeir mögulega geta. Þrátt fyrir að ræða Vilhjálms (sem var án efa skrifuð af fjölmiðlafulltrúa hans) snérist um að einbeita sér að dýrum í útrýmingarhættu er Vilhjálmur of heimskur til að átta sig á því að dýr líkt og tígrisdýr og nashyrningar eru í útrýmingarhættu vegna þess að fólk eins og hann og bróðir hans hafa skotið þau af kortinu, allt saman í nafni íþrótta og slátrunar. Þegar að þú skýtur dýr í höfuðið er útkoman nær alltaf sú sama – dauði.“

Morrissey hélt svo áfram og sagði „En rökhyggjufólkið á meðal okkar, sem fær aldrei að tala, er nógu gáfað til að vita að dýrategundir í útrýmingarhættu eru að deyja út útaf fólki eins og Vilhjálmi og Harry, og þessvegna getum við aðeins vonað að byssurnar þeirra snúi öfugt þannig að prinsarnir skjóti sig í andlitið“