Persónuupplýsingum stolið

Tölvuþrjótar réðust á síðuna Kickstarter og láku upplýsingum um notendur vefsins. Wall Street Journal greinir frá málinu.

Vefsíðan er vettvangur fyrir fólk til að koma að fjármögnun smærri verkefna og hafa fjölmargir frumkvöðlar nýtt sér þjónustuna eins og Vísir hefur áður greint frá.

Samkvæmt yfirlýsingu frá fyrirtækinu var engum greiðslukortaupplýsingum lekið en þjófarnir komu höndum sínum yfir notendanöfn, lykilorð, netföng, heimilsföng og símanúmer notenda síðunnar.

Brotin hafa verið rakin til tveggja notenda Kickstarter og hafa forsvarsmenn vefsins haft samband við þá sem grunaðir eru um aðkomu að málinu.

Aðstandendur Kickstarter hafa brýnt fyrir notendum að breyta lykilorðum sínum.