Gilbert vill skrifa eins og Dickens

Metsöluhöfundurinn Elizabeth Gilbert, höfundur smellsins Borða, biðja, elska, er þessa dagana að senda frá sér sína fyrstu skáldsögu í tólf ár. Bókin nefnist The Signature of All Things og sögutíminn er nítjánda öldin, þannig að óhætt er að segja að Gilbert rói á algjörlega ný mið.

Gilbert sagði í samtali við The New York Times á dögunum að fyrirmyndir hennar við ritun þessar sögu hefðu verið hinar breiðu skáldsögur nítjándu aldarinnar og að hana hefði langað til að skrifa stóra frásögn með mörgum núönsum í anda Dickens, Brontë-systra og George Eliot. Ætti að verða spennandi að sjá útkomuna.

Bókin er ekki komin í sölu en hægt er að forpanta hana á heimasíðu höfundarins.