Transaquania – Into thin air fær frábæra dóma í Þýskalandi

Transaquania – Into thin air eftir danshöfundana Ernu Ómarsdóttur og Damien Jalet og myndlistarkonuna Gabríelu Friðriksdóttur fær mjög góða dóma í þýsku fjölmiðlunum Die Welt og Hamburger Abendblatt og er sagt einn af hápunktum Nordwind-hátíðarinnar.



Sagt er um verkið í Die Welt: „Í stórfenglegum dansi sameinast öflugar myndir sem eru bæði truflandi, dulúðlegar, upplífgandi og fagrar á sama tíma,“ og í Hamburger Abendblatt segir: „Áhrifamiklar myndir við angurværa tónlist sem sitja munu lengi í minni.“



Nordwind-hátíðin fór fram frá 22. nóvember til 14. desember í Berlín, Hamborg og Dresden en á henni er athyglinni beint að því helsta sem er að gerast í sviðlistum og tónlist á Norðurlöndunum. Aðrir Íslendingar sem sýndu verk sín á hátíðinni í ár voru meðal annars Ólafur Arnalds, Margrét Sara Guðjónsdóttir, Egill Sæbjörnsson og Sigríður Soffía Níelsdóttir.

Shalala sá um uppsetningu verksins nú en það var upphaflega samið fyrir Íslenska dansflokkinn.