Lily Collins dáist að Lawrence

Lily Collins, leikkona og dóttir söngvarans Phil Collins, lítur upp til leikkvenna á borð við Jennifer Lawrence og Kristen Stewart. Þetta kemur fram í viðtali sem tímaritið Seventeen tók við leikkonuna.

„Ég dáist að því hvernig Kristen og Jennifer hafa tekist á við frægðina sem fylgir hlutverkunum í Twilight og Hungurleikunum. Ég dáist einnig að því hvernig þær hafa getað skilið sig frá þeim hlutverkum og tekið að sér ný hlutverk. Þetta er það sem ég vil gera: finna jafnvægi á milli stórmynda og smærri mynda,“ sagði leikkonan. Hún fer með hlutverk Clary Fray í ævintýramyndunum The Mortal Instruments.

Collins drekkur hvorki né reykir og er stolt af því. „Ég fann ekki gleðina í drykkju. Ég vildi muna eftir öllum góðu stundunum sem ég átti með vinum mínum í stað þess að vakna daginn eftir og hugsa: „Hmm, ég held að ég hafi skemmt mér“.“