Með fiðrildi í maga af spennu

Íslandsmót yngri flokka í hestaíþróttum er haldið á Hlíðarholtsvelli á Akureyri um helgina. 99 krakkar keppa á mótinu á 242 hestum. Þeirra á meðal er Þóra Höskuldsdóttir 16 ára Akureyrarmær.

„Ég er að keppa í fimm greinum á fjórum hestum,“ segir Þóra glaðlega en hún hóf keppni í fjórgangi í gær og á eftir að keppa í tölti, fimmgangi, slaktaumatölti og gæðingaskeiði.

En stefnir þú á sigur?

„Auðvitað vonast maður eftir sigri en keppendur eru rosalega margir og góðir, við erum allt upp í 40 í hverjum flokki,“ svarar Þóra sem segist þó vera með mjög fína hesta á sínum snærum. „Ég gæti alveg unnið en þá þarf líka allt að smella saman, hesturinn, skapið hjá þeim og mér, einbeitingin og dagsformið.“

Þóra er mjög spennt fyrir mótinu. „Það er alltaf skemmtilegt að keppa. Maður sofnar reyndar með fiðrildi í maganum af spennu en það er bara gaman,“ segir Þóra sem hefur ekki keppt á Íslandsmóti áður. „Mótið hefur ekki verið haldið á Akureyri lengi og það er dýrt að flytja marga hesta landshorna á milli,“ segir Þóra. Hún hefur þó keppt á fjölmörgum mótum frá unga aldri á Norðurlandi, enda hefur hún alist upp umkringd dýrum.

„Pabbi er tamningamaður og mamma er dýralæknir. Hesthúsið og dýralæknastofan eru í sömu byggingu og í sumar vinn ég hálfan daginn hjá mömmu og við tamningar hjá pabba seinnipartinn,“ upplýsir Þóra sem útskrifaðist úr grunnskóla í vor, ætlar í MA í haust en framtíðaráætlanirnar snúast um dýralæknisfræði.

Hestamennskan á þó einnig hug hennar allan og í henni hefur hún kynnst góðum hópi vina. Í hestamannafélaginu Létti er þéttur hópur unglinga sem hefur keppt sín á milli á innanfélagsmótum frá unga aldri. Þóra segir vinskapinn ekki líða fyrir keppnisskapið.

„Við erum svo sjóuð í þessu, erum góðir vinir og förum ekkert í fýlu þau einhver annar vinni. Svo má maður ekki gefast upp heldur verður maður bara að reyna aftur næst,“ segir þessi skelegga Akureyrarmær og leggur á næsta hest.