Nýir eigendur Blómasmiðjunnar

„Fyrstu mánuðirnir fara vel af stað," segir Málfríður Hildur Bjarnadóttir en hún tók við versluninni Blómasmiðjunni í Grímsbæ í október síðastliðnum ásamt fjölskyldu sinni.

„Pabbi sér um ferskvöruna, útfararskreytingar og ýmislegt fleira af sinni stöku snilld. Hann þekkir bransann vel en hann stofnaði Blómaval á sínum tíma ásamt mömmu, bróður sínum og konunni hans. Hann segir lítið hafa breyst. Fólk sækist eftir því sama og fyrir 40 árum. Mamma sér um uppgjör og slíkt en hefur líka gert kransa og fleira, enda mikil listakona sjálf," útskýrir Málfríður og segir forréttindi að fá að vinna svo náið með foreldrum sínum.

„Ég er kennari að mennt en hef sinnt ýmsum störfum með námi og eftir að því lauk. Það má segja að ég hafi alist upp í Blómaval. Pabbi var líka mjög hissa þegar hann komst að því nú í haust að hann þurfti voða lítið að kenna mér. Það verklega hafði síast inn í uppeldinu og gleymist ekki," segir Málfríður brosandi.

Hún segir fjölskylduna leggja áherslu á góða og persónulega þjónustu. „Við viljum gera góða þjónustu að sérstöðu búðarinnar og bjóðum alla velkomna til okkar. Stór liður í þjónustunni er vegna útfara og viljum við veita hana í samráði við aðstandendur og gerum allt sem við mögulega getum til að koma til móts við óskir hvers og eins."

Blómasmiðjan er til húsa í verslunarmiðstöðinni Grímsbæ við Efstaland 26. Aðkoma að miðstöðinni er góð og næg bílastæði.