Heimilislaus maður lét Burleson heyra það

NFL-lið Detroit Lions á ekki glæsta sögu og var lengi vel eitt lélegasta lið deildarinnar. Það eru þó bjartari tímar fram undan hjá félaginu. Borgarbúar hafa samt ekki allir enn trú á liðinu.

Ljónin eru á leiðinni í úrslitakeppnina eins og staðan er í dag en slæmt tap í snjónum í Philadelphia um síðustu helgi minnti á gömlu tímana er liðið gat ekki neitt.

Einn af útherjum liðsins, Nate Burleson, var að sinna góðgerðarstarfi í gær. Var að gefa heimilislausum að borða og fékk þá að heyra það.

"Þið eruð sorglegir. Þið hafið ekkert breyst. Þetta eru sömu, gömlu, ömurlegu ljónin," hreytti heimilislaus maður í Burleson.

Leikmaðurin tók athugasemdinni með ró. Sagðist hafa fullan skilning á tilfinningum aðdáandans eftir öll lélegu árin.