Dómari dæmdur í bann fyrir kjaftbrúk

Það er alþekkt í íþróttum að leikmenn láti dómarann heyra það en það gerist ekki oft að dómarinn láti leikmanninn fá það óþvegið.

NFL-dómarinn Roy Ellison hikaði þó ekki við að láta Tretn Williams, leikmann Washington Redskins, heyra það um daginn og hann hefur verið dæmdur í eins leiks bann fyrir talsmátann í garð leikmannsins.

"Dómarinn kom upp að mér og kallaði mig rusl og drullusokk. Það er ekkert pláss fyrir slíka hegðun í deildinni," sagði Williams en hann var í losti yfir þessari hegðun.

Ellison hefur dæmt í deildinni í ellefu ár og nýtur mikillar virðingar. Þetta uppátæki hans kom því öllum á óvart.