Sannleikurinn: "En á björtu nótunum þá hefst 30 ára afmælisdagskrá Rásar 2 á morgun“

Öllum starfsmönnum RÚV sem ekki gátu framvísað flokksskirteini hjá ríkisstjórnarflokki eða eru ekki fastir gestir í jólaboði hjá Páli Magnússyni útvarpsstjóra hefur verið sagt upp vegna niðurskurðar sem kallaður hefur verið stærsti sigur ríkisstjórnarinnar gegn menningarlífinu á Íslandi.

„Það er óhjákvæmilegt að niðurskurður af þessari stærðargráðu hefur mikil áhrif á dagskrá Ríkisútvarpsins. Á tímabili voru meira að segja nýju þættirnir, Sunnudagsmogginn með Gísla Marteini og spennuþrungni skemmtiþátturinn Vertu viss í hættu. En ég náði að bjarga þeim með því að vængbrjóta Kastljósið,“ sagði Páll Magnússon við fréttastofu.

„En á björtu nótunum þá hefst 30 ára afmælisdagskrá Rásar 2 á morgun og við ætlum að blása til mikils fagnaðar.“



Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  en vegna niðurskurðar höfum við þurft að segja upp lesendum.