Sannleikurinn: Stuðningsmaður ríkisstjórnarinnar stórslasaður eftir fagnaðarlæti

Hræðilegur atburður skyggði á annars frábæran 39 manna niðurskurð hjá RÚV í dag. Einn stuðningsmaður ríkisstjórnarinnar var að fagna sigri Vigdísar Hauksdóttur, sem var náttúrulega í þessum hagræðingarhópi, á hinni vinstri sinnuðu og ESB hallandi fréttastofu þegar hann féll fram fyrir sig niður stiga milli hæða á skrifstofu Samtaka atvinnulífsins og lenti á höfðinu.

Fallið var mikið en að sögn lögreglu tók höfuðið af honum fallið. Hann hlaut þó alvarlega höfuðáverka en ekkert skemmdist sem ekki þegar var ónýtt.



Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  en vegna niðurskurðar höfum við þurft að segja upp lesendum.