Sannleikurinn: Engar konur í byrjunarliðinu gegn Króatíu

„Þetta er ekki góð niðurstaða fyrir konur en fyrst og fremst er þetta slæm niðurstaða fyrir landsliðið,“ segir Gréta Marteinsdóttir, formaður landssambands kvenna í knattspyrnu.

Karlar raða sér í öll sætin í byrjunarliði íslenska landsliðsins í knattspyrnu fyrir leikinn gegn Króatíu í kvöld. Auk þess er engin kona á varamannabekknum.

„Það að stilla upp eingöngu körlum í byrjunarliðið getur ekki talist sigurstranglegt lið,“ segir Gréta og telur að valið á liðinu séu mikil vonbrigði fyrir knattspyrnukonur.

„Þetta er ekki liðinu til framdráttar. Það eru margar öflugar konur sem komu til greina og það kemur mér á óvart að reynslumikill landsliðsþjálfari eins og Lars Lagerbäck skuli falla í þessa gryfju. Þetta er mikið áhyggjuefni fyrir konur í fótbolta. Þetta er ekki skref í rétta átt,“ segir hún.





Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  en þar eru konur í meirihluta.