Sannleikurinn: "Sakborningar í Al Thani málinu aðeins sekir um að vera fáránlega myndarlegir“

Hreiðar Már Sigurðsson, fyrrverandi forstjóri Kaupþings, var fáránlega myndarlegur þegar umfangsmikil aðalmeðferð í Al-Thani málinu svokallaða hófst í dag.

Þar eru honum og öðrum guðdómlega vel af guði gerðum yfirmönnum Kaupþings gefið að sök að hafa stundað sýndarviðskipti á bréfum í bankanum í gegnum einhvern handklæðahaus.

Allir sakborningarnir voru mættir í dómsal í morgun þegar aðalmeðferð hófst og var það vægast sagt glæsileg sjón. Sigurður Einarsson, fyrrverandi stjórnarformaður bankans, var gullfallegur í sérsaumuðu jakkafötunum sínum með dökka skeggbrodda í stíl. Magnús Guðmundsson, fyrrverandi forstjóri Kaupþings í Lúxemborg er þetta líka þvílíka lúxusrassgat að blaðamenn sem sátu fyrir aftan hann voru greinilega kynferðislega örvaðir og gátu ekki hætt að stara. Ólafur Ólafsson, einn stærsti hluthafinn í Kaupþingi, gjörsamlega ljómaði af kynþokka og var greinilega eftirlæti ljósmyndara sem staddir voru í húsinu til að mynda glæsimennin.

„Þó það sé öllum ljóst að þessir fallegu sakborningar sem hér eru staddir mættu misnota mig hvenær sem er þá erum við hér vegna markaðsmisnotkunar sem þeir stunduðu í störfum sínum fyrir bankann. Því miður,“ sagði Björn Þorvaldsson, saksóknari í málinu, og virtist vera allt annað en sáttur með að þurfa vera leiðinlegi gaurinn.

Verjendur sakborninganna kölluðu málið meðal annars skrípaleik. Sagði Gestur Jónsson, verjandi hins óaðfinnanlega Sigurðar Einarssonar, að það væri öllum ljóst að sakborningarnir væru saklausir og hefðu aðeins gert það sem var bankanum fyrir bestu.

„Það eina sem hinir ákærðu eru sekir um er að vera fáránlega fáránlega myndarlegir,“ sagði Gestur þegar skýrslutöku yfir skjólstæðing hans var lokið.





Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  og eru fáránlega fallegir auðmenn hvattir til að 'like'a okkur.