Teitur gæti söðlað um

Knattspyrnuþjálfarinn Teitur Þórðarson á í viðræðum við norska knattspyrnufélagið Stördals-Blink um að taka við þjálfun liðsins.

Teitur er í dag þjálfari Funnefoss/Vormsund í norsku þriðju deildinni. Liðið er í toppbaráttunni og á góða möguleika á að komast upp um deild. Teitur viðurkennir þó að hafa rætt málin við Stördals-Blink.

„Félagið hafði samband við mig og aðstæður eru þannig hjá mér að starf hjá Stördals-Blink er áhugavert,“ sagði Teitur við Stördalens Blad.

Framkvæmdastjóri félagsins hefur mikinn áhuga á að fá Teit til starfa. Hann segist vona til þess að hægt verði að ganga frá málunum á næstu tveimur mánuðum.

Verði af vistaskiptunum mun Teitur komast nær syni sínum og barnabörnum sem búa í Skatval.