Ekki hissa á því að ríkisstjórnin reyni að leggja niður Sérstakan saksóknara

Björn Valur Gíslason, varaformaður Vinstri grænna, segir það ekki koma sér á óvart að ríkisstjórn Sjálfstæðis og Framsóknarflokks skeri niður fjárveitingar til Sérstaks saksóknara.

Sérstakur saksóknari fær einungis 559 milljónir króna ráðstafaðar frá ríkinu á næsta ári. Heimildir Harmageddon herma að starfsmenn þar túlki það nánast sem lokun embættisins. Það er í það minnsta líklegt til að draga verulega úr þeirri starfsemi þegar litið er til þess að embættið var rekið á 1.350 milljónum króna á núverandi starfsári.

Björn Valur minnti á að Eva Joly, sem var sérlegur ráðgjafi ríkisins vegna rannsókna á efnahagsbrotum sem tengdust hruni fjármálakerfisins, hefði í upphafi varað við þessari þróun.

„Hún sagði að það yrði reynt að tortryggja þessar rannsóknir og þegar þeir kæmust aftur að þá myndu þeir reyna að leggja þessi embætti niður,“ sagð Björn Valur og átti þá við svokallaða hægri menn sem nú sitja í ríkisstjórn.

Hann sagði niðurskurðinn til málaflokksins einungis tilraun þeirra til að draga úr uppgjöri hrunsins og leið til að koma félögum sínum til bjargar eins og það var orðað.

Hægt er að hlusta á brot úr viðtalinu við Björn Val hér að ofan.