Lauren Oosdyke samdi við Grindavík

Kvennalið Grindavíkur hefur fundið sér nýjan bandarískan leikmann fyrir tímabilið en félagið samdi  nýverið við framherjann Lauren Oosdyke sem spilaði stórt hlutverk hjá University of Northern Colorado í bandaríska háskólaboltanum.

Lauren Oosdyke var með 13,3 stig og 5,7 fráköst að meðaltali á lokaári sínu með University of Northern Colorado. Hún hitti úr 29,5 prósent þriggja stiga skota sinna og 72,7 prósent vítanna. Oosdyke er meðal fimm efstu í sögu skólans í stigum (1548), fráköstum (763) og stolnum boltum (183).

Lauren Oosdyke var í viðtali á heimasíðu skólans eftir að hún skrifaði undir samninginn við Grindavík.

„Ég er mjög spennt fyrir að fara erlendis og kynnast nýrri menningu og nýju fólki. Þetta er eitthvað sem ég hef alltaf stefnt á og ég vildi ekki missa af þessu tækifæri," sagði Lauren Oosdyke í viðtali á UNCBears.com.

„Ég talaði við þjálfarann í síma á dögunum og hann virkaði mjög almennilegur. Hann talaði enskuna líka virkilega vel en ég hafði smá áhyggjur af því hvort ég myndi skilja allt á æfingum. Ég þarf í það minnsta ekki að kaupa orðabók," sagði Oosdyke í léttum tón.

Jón Halldór Eðvaldsson tók við þjálfun Grindavíkurliðsins en hann gerði Keflavík að Íslandsmeisturum árið 2011. Pálína Gunnlaugsdóttir og Ingibjörg Jakobsdóttir skiptu líka báðar yfir í Grindavík úr Íslandsmeistaraliði Keflavíkur.

„Þjálfarinn sagði einnig við mig að ég á bæði að spila inn í teig og fyrir utan alveg eins og ég gerði í skóla. Ég get því verið "póst"-leikmaður en fæ einnig að spila þristinn. Ég var mjög ánægð að heyra það," sagði Oosdyke en það er hægt að lesa allt viðtalið með því að smella hér.