Íslandstökur Interstellar hefjast á morgun

Tökur hefjast á Svínafellsjökli á morgun á kvikmynd leikstjórans Christophers Nolan, Interstellar. Rúmlega 300 manna tökulið vinnur við myndina hér á landi samkvæmt upplýsingum frá Saga Film, þar af yfir 100 Íslendingar, og verður gönguleiðum við jökulinn lokað á tímabilinu 11. til 19. september.

Í tilkynningu frá Vatnajökulsþjóðgarði segir að lokunin nái til gönguleiðar meðfram jöklinum undir Hafrafelli frá bílastæði við Hafrafell og gönguleiðar að Svínafellsjökli frá vegslóða vestan við Freysnes.

Með aðalhlutverk Interstellar fara Matt Damon, Matthew McConaughey og Anne Hathaway og eru þau öll væntanleg til landsins, en í öðrum hlutverkum eru Jessica Chastain, Casey Affleck, John Lithgow, Ellen Burstyn og sjálfur Michael Caine.

Þetta er í annað sinn sem Nolan tekur kvikmynd að hluta til hér á landi, en hann heimsótti Vatnajökulsþjóðgarð fyrir átta árum ásamt Leðurblökumanninum þar sem teknar voru upp senur fyrir myndina Batman Begins.