RG III spilar um næstu helgi

Það eru aðeins átta mánuðir síðan leikstjórnandinn Robert Griffin III sleit liðbönd í leik með Washington Redskins. Þá var óttast að hann gæti misst af meirihluta þessa tímabils.

Nútíma læknavísindi láta ekki að sér hæða og Griffin hefur nú staðfest að hann verði klár í fyrsta leik Bleiknefja um næstu helgi.

RG III staðfesti þetta sjálfur á Twitter-síðu sinni, stuðningsmönnum Redskins til mikillar gleði.

RG III sló í gegn á sínu fyrsta ári í deildinni og þykir einn mest spennandi leikmaður sem hefur komið fram í deildinni lengi.

Hann er einnig ákaflega vinsæll og seldi flestar treyjur allra leikmanna deildarinnar í fyrra.