200 milljóna króna sleðabraut í Hveragerði

Ef allt gengur eftir áætlun verður eins manns sleðarennibraut komin í gagnið í Kömbunum ofan við Hveragerði vorið 2015. Þetta kom fram í útvarpsþættinum Harmageddon í morgun.

Verkfræðingarnir Davið Örn Símonarson, Skúli Sigurðsson, Dóra Björk Þrándardóttir og Sindri Rafn Sindrason hafa unnið að verkefninu í nokkra mánuði og eru í óðaönn að kynna hugmyndina fyrir fjárfestum og sveitarfélögum á svæðinu. 



Um er að ræða 200 milljón króna fjárfestingu sem gæti orðið skemmtileg viðbót við afþreyingarflóruna rétt utan við höfuðborgarsvæðið, bæði fyrir ferðamenn sem heimsækja landið jafnt og Íslendinga sem eru orðnir þreyttir á ísbíltúrum og einhæfum bíóferðum.

Fyrirbærið er vel þekkt á skíðasvæðum í Evrópu þar sem menn hafa boðið upp á eins manns sleðabrautir yfir sumartímann þegar veturinn hefur sleppt tökunum á brekkunum.

Hægt er að sjá hvernig sambærileg braut lítur út á myndbandinu sem fylgir hér að ofan.