Frábær úrslit fyrir Ísland

Rúmenar unnu í kvöld 77-74 sigur á Búlgörum í undankeppni Evrópumótsins árið 2015 en þjóðirnar eru í riðli með Íslandi. Sigurinn er frábær tíðindi fyrir okkar menn.

Ísland steinlá fyrir Búlgaríu í fyrsta leik sínum í riðlinum. Búlgarar höfðu þegar lagt Rúmena í fyrsta leik sínum í riðlinum og því útlit fyrir að Ísland þyrfti að vinna stórsigur á Búlgörum í heimaleiknum nú á þriðjudaginn. Úrslitin í kvöld breyta því.

Ísland vann sannfærandi sigur á Rúmenum í öðrum leik liðsins ytra í vikunni. Liðinu dugar nú að leggja Búlgari og Rúmena, óháð stigamun til þess að tryggja sér sæti á næsta stigi keppninnar.

Ísland mætir Búlgaríu á þriðjudagskvöldið og svo Rúmeníu á föstudagskvöldið. Báðir leikirnir fara fram í Laugardalshöll og hefjast klukkan 19.15 Miðasala fer fram á Midi.is.