Lögreglan fann leyniíbúð Hernandez

Sönnunargögnin halda áfram að hlaðast upp gegn NFL-leikmanninum Aaron Hernandez en hann var handtekinn og ákærður fyrir morð um daginn.

Nú hefur lögreglan fundið leyniíbúð Hernandez þar sem sönnunargögn eiga að hafa fundist samkvæmt bandarískum fjölmiðlum. Meðal annars er þar bolur og derhúfa sem Hernandez á að hafa klæðst kvöldið örlagaríka.

Vinur Hernandez sagði lögreglunni frá íbúðinni en sá á að hafa verið með Hernandez er hann myrti Odin Lloyd.

Hernandez heldur fram sakleysi sínu í málinu. Hann er án félags en New England Patriots rak hann þegar ljóst var að hann yrði handtekinn.

Þess má síðan geta að 29 leikmenn úr NFL-deildinni hafa verið handteknir síðan tímabilinu lauk í febrúar.