Jón Sverrisson gerir tveggja ára samning við Stjörnuna

Körfuknattleiksmaðurinn Jón Sverrisson hefur skrifað undir tveggja ára samning við Stjörnuna.

Jón er uppalinn hjá Fjölni en hefur nú ákveðið að taka næsta skref á sínum ferli og spila með félaginu í efstu deild og eiga möguleika á því að berjast um titla.

Stjarnan varð bikarmeistari á síðasta tímabili og fór alla leið í oddaleik um Íslandsmeistaratitilinn í körfubolta þar sem liðið tapaði fyrir Grindavík.

Jón Sverrisson varð fyrir því óláni að slíta krossband í janúar á þessu ári en það gerðist einmitt í leik gegn Stjörnunni.

Leikmaðurinn verður því vonandi kominn af stað fyrir áramót.

Á fésbókarsíðu körfuknattleiksdeildar Stjörnunnar segir:

Það er ljóst að Jón verður góð viðbót við þann sterka hóp leikmanna sem fyrir er í Stjörnunni. Stjarnan býður Jón hjartanlega velkominn í Garðabæinn og vonast til að sjá hann í Stjörnubúningnum sem fyrst.