Button: McLaren betri í Mónakó

McLaren-ökuþórinn Jenson Button segir bíl sinn standa betur að vígi í Mónakó en á öðrum kappakstursbrautum. Ástæðan sé sú að í Mónakó er keppt á hægri götubraut.

„Jafnhraði okkar í löngum sprettum kom á óvart,“ sagði Button eftir æfingar liðanna í gær. „Ekki það að það skipti miklu máli þegar maður ekur 1,2 sekúndum hægar en hinir í tímatökum í Mónakó...“

Button segir vandamálið vera að rásstaða skipti miklu máli í Mónakó og það sé ekki sterkasti flötur McLaren-bílsins í því ástandi sem hann er nú. „Það er okkar veikleiki í augnablikinu. Við hreinlega getum ekki náð réttum hita í dekkin í einum hring.“

„Ég er ánægðari með bílinn hér en í síðustu keppnum,“ segir Button. „Það eru nokkrir jákvæðir fletir á þeim vandamálum sem við höfum barist við undanfarið. Vegna þess að Mónakókappaksturinn er allt öðruvísi en önnur mót þá höfum við breytt bílum okkar nokkuð mikið og hann virðist virka betur.“

„Við erum enn ekki að setja neina geðveika tíma en ég er ánægðari með við erum á réttri braut og ég held að við getum gert betur á sunnudag.“